الثلاثاء، 20 مايو 2008

المؤتمر ده يصعب على امثالي فهمه

انا طبعا مش زي سيد مراد اللي متسأف ومتنور وفاهم في الاكتساد والتشيجارة والكلام الواعر ده
انا مواطنة كظماني املي في الحياة اني الاقي رغيف عيش، طبعا انا شفت قائمة الاسماء اللي في مؤتمر، ناس نضيفة نضيفة اكصلانصات يعني، واحنا مضايفينهم على حسابنا، آه وربنا على حسابنا، الضرايب اللي بندفعها من المرتب والمكافأة (حسرة عليها) والحوافز وضريبة المبيعات وضريبة الزبالة على الكهربا والكهربا على المية والمية على الغاز والغاز على السيفون، كل الفلوس دي راحت للاكصلانصات والباشا بوش اللي جه شخط فينا وقال لنا في هذه المنطقة من العالم يجلس الرئيس في كرسي الحكم اكثر من ثلاثين سنة بينما يقبع منافسوه في السجن، آه علينا احنا يعني، وبينما سعادة الريس، الفلاح الاصيل، اللي بيفهم في اصول الضيافة، دافع من دم قلبنا استضافة الاخوة كرامازوف، كان بوش مش حاضر الكلمة اللي هو بيقولها، وبعدين مسح بيه البلاط واتخانق معاه، واحنا مالنا اهم ناس اكصلانصات في بعضيهم
انا بالنوسبة لي: هل مؤتمر دا...فس ده له علاقة باننا ما بنزرعش قمح؟
هل له علاقة بان المصانع اتبعات والعمال اتشردوا؟
له علاقة بان الفلاحين بينطردوا من اراضيهم والاقطاع بيرجع؟
له علاقة بان الاقطاع بيزرع يوسفندي وبرتقان وبيصدر واحنا ناكل خرا؟
له علاقة بان الصحرا بيتم استصلاحها عشان تزرع اورجانيك كيلو الاوطة فيه بعشرين جنيه ويتصدر عشان احنا ناكل اكل مسرطن؟
له علاقة بان مشروع شباشب المستقبل بتاع السيد جمال مبارك ما بيشغلش غير خريجين الجامعة الامريكية وبس؟
له علاقة ببيع غازنا ببلاش لاسرائيل وبعد كده لما يخلص الغاز ح نشتريه بالغالي ونبيعه لهم بالخسارة؟
له علاقة بان وزيرة العمل قالت: ح نعمل اتفاقيات عشان نهجر الشباب المصري؟ آه والله قالت كده هي اصلها اللي في قلبها على لسانها
له علاقة بان ميدان التحرير اتباع وهم رافعين علينا قضية؟
له علاقة بان الدولة مش عايزة تنفذ مشروع ممر التنمية بتاع فاروق الباز بقالها خمسة وتلاتين سنة؟ لحد ما الراجل اخر ما زهق نشره في كتاب ووزعه وقال يا ناس اللي يعرف ينفذه ياخده انا مش عايز حاجة؟
له علاقة بان مشروع زراعة مليون فدان في سيناء (واللي ح يغير خريطة المطر عندنا وح يفيدنا) متخزن ومش بيتنفذ واللي بيتنفذ دلوقت هو بيع اراضي سيناء لمستثمرين اجانب معظمهم يهود؟
طب وبيع الاراضي دي له علاقة بالطفلة اللي اتقتلت على الحدود هي وعمها؟ عايزين مثلا يطفشوا السكان عشان يشتروا بقية الاراضي اللي فاضلة؟
طب كل ده له علاقة بان مدينة شرم الشيخ مش بتاعة المصريين وفيها اماكن ممنوعين ندخلها؟ طبعا ودي اشكال تدخل اماكن نضيفة زي دي؟ ده احنا جرابيع
طب ده كله له علاقة باننا جرابيع؟
طب المؤتمر ده له علاقة بالنشاط الزراعي المشترك اللي خلى تلاتين في المية من المصريين عندهم الله اكبر في اللامؤاخذة؟
طب وده له علاقة برجلين الفلسطينيين اللي ح تتقطع لو عتبوا الحدود المصرية؟ وله علاقة بالبمبوطي اللي اتقتل من غير دية؟
وهلبت له علاقة بان مصر ما بقاش لها اي دور اقليمي؟
هل دور مصر الاقليمي له اي علاقة بان الناس مش لاقية تاكل وان المواصلات غليت؟
هل فيه ناس بتخدم المصالح الامريكية بهبل وغباوة واللي ثبت بالدليل القطعي، زي ما ثبت ان القمر افيد من الشمس، ثبت انها دايما دايما دايما ضد مصالحنا؟
اصل احنا ناس طيبة والله، ونحب ننفع ونستنفع، وان جالك الطوفان حط ابنك تحت رجليك
يعني بالبلدي كده ومن الاخر، لو خدمتنا للمصالح الامريكية وتآمرنا على المقاومة مثلا، وانعزالنا عن العرب بل وعمالتنا لاسرائيل كمان ح تأكلنا عيش وتعيشنا زي البني ادمين بصراحة يعني ناس كتير ح تقول اللي يصعب عليك يفقرك واحنا مش ح نجوع عشان خاطر الفلسطينيين والعرب كل واحد يشيل نفسه وقال يا نحلة لا تقرصيني ولا عايز عسل منك
بالامانة يعني احنا بنقول الحق والجوع كافر
طب هلبت ليه بقى احنا مستعدين لده بينما الوليات المتحدة واسرائيل مش مستعدة؟
فيه ناس كتير بقالها سنين بتقول: احنا مش عرب، واحنا مالنا ومال العرب؟ واخدنا ايه من القضية الفلسطينية؟ واحنا ياما دفعنا وووو
وبصراحة بنعايرهم معايرة منوفي واطية
وفيه ناس بتقول: ومالها امريكا، خلينا نقب بقى على وش الدنيا
وفيه ناس بتقول سلام سلام هو انا ح نعادي اسرائيل ليه ما احنا اخدنا ارضنا خلينا نعيش بقى
ماشي ماشي ماشي
السؤال اللي بتطرحه واحدة جهولة زيي؟
ليه كل ما نغمق في المنطق ده نفتقر اكتر؟ ليه كل ما نستندل مع القضية الفلسطينية نجوع اكتر؟ ليه كل ما نترمي في حضن امريكا واسرائيل ونخدمهم خدمة العبد للسيد ونبوس اعتابهم ونشيل عنهم الازمة الاقتصادية اللي مروا بيها في حداشر سبتمبر ونساعدهم في حربهم على افغانستان والعراق ونقفل على الفلسطينيين المعبر ونجوعهم نتوكس اكتر واكتر لحد ما بقينا نسف التراب؟
هل فيه علاقة بين ده وده؟
الله؟ هلبت بقى ما بتوع الشأن الداخلي دول بيخدموا امريكا من غير ما يحسوا؟ اكيد من غير ما يحسوا، لان اللي بيشتغل عميل هنياله البغددة
ياريت حد يفهمني اصل انا تايهة في شرم الشيخ وصندلي اتسرق في الجامع والبوك بتاعي وقع مني ووخالتي ماتت السنة اللي فاتت ومتعورة في صباعي

هناك 4 تعليقات:

dawar يقول...

لييه كده يانوارة توصفى المنايفه كده
احنا مالنا ومال الحكومه
انا عايش يانوارة فى شارع فيه لمبات صفرا امام بيوت الكبرات بس
امام بيوت من له معرفه بشركه الكهرباء
شارع تراب كله النهارده مطلع من البيه 120 كيلو تراب رغم ان التراب بيموتنى
انا باتعالج على حسابى وبارفض علاج التامين الصخى الذلى هو عبارة عن تراب معاد تصنيعه
امال هيكسبوا ازاى
رغم عملى بالخليج مايقارب 20 سنه لااسنطيع ان اشترى موتوسيكل الدوله اكلت كل حاجه
وباتعالج على حسابى بارفض اروح مستشفى التامي
بالعن ابو اليوم اللى اتولدت فيه غى هذا العصر
وبعدين تقولى علينا يانوارة وانتى ليكى معزة خاصه معايرة منوفى واطيه معلهش
ماكنتش متخيل انها منك يانوارة وانا النهاردة معجب الصبح بمقالك الجميل

معلهش لعلمك المنوفى الصح يرفض العار
تجوع الحرة ولاتأكل بثدييها

المنوفى اللى بيضرب باى حاجه
كفايه ان ماعندناش حراميه سرقوا فلوس الناس
اسالى عننا الاول
زورينى
http://telespy.blogspot.com
http://harbic.blogsome.com
http://alkoga.blogspot.com
http://dawar-anas.blogspot.com

جبهة التهييس الشعبية يقول...

:)
ايها الاخوة المنايفة انتوا المسئولين عن مسح العار اللي الحقه بكم كل من مبارك والسادات
التار ولا العار

سبهللة عالآخر يقول...

الاخ dawar
يعنى انت سبت كل البلاوى اللى فى البوست دة
ومسكت فى كلمة المنايفة

نوارة
حبيت افكرك بالقرص المنوم يا حبيبتى قبل ما الضغط يعلى عليكى وتنفجرى
من الغيظ
اوعى تنسيه
احنا محتاجينك يا زعيمة
بس فى حاجة انتى نسيتها
اخترعوافى مصر نوع جديد من الاستشهاد فى سيبل الله
مش بيقولك اللى يموت وهو بيجرى على رزق عياله يبقى شهيد
يعنى اللى يموت فى طابور العيش ويندهس بالرجلين ولا يتقطع له صوابعه
تفتكروا يبئى شهيد؟؟

روح البيت يقول...

نعم ؟؟؟؟؟
بس بجد حلوة منك